Comezan os movementos de cara ás municipais: fichaxes

Xa están á vista as próximas eleccións municipais, en maio do 2011, e os politiquiños ordenses comezan xa todo tipo de maniobras que lles permitan chupar da teta outros catro anos. Nin que dicir ten, que a política en Ordes non é n confronto de programas, ideas, ideoloxías, etc., senón de personalismos, ambicións, cobizas individuais, etc.

-UxO é o partido personalista de Regos, fortalecido polo poder, e nada parece indicar que haxa cambios de importancia dentro del para as eleccións. O seu flirteo co PSOE de Cerceda rematou, ai!, cando o bipartito perdeu a Xunta, e deixou de ser un carro suculento ao que se subir. De momento non temos novidades que comentar sobre UxO.

-O PP xogou as súas bazas totalmente desarticulado. Estrella é a líder emerxente, en canto Martino xogou nos plenos o papel do resentido, limitando as súas intervencións a trifulcas infantís e repetir machaconamente cousas do estilo “esto com mi gobierno ya se hizo”, “eso ya lo hice yo de alcalde”, etc... Fálase agora de que José Luis Martínez Sanjurjo podería encabezar as listas do PP, mentres Martino concurriría nunhas listas independentes. José Luis Martínez fora nas pasadas eleccións nas listas de Terra Galega con Roberto González. Por certo que para o PP saltou tamén Susana García, a non tan fiel escudeira de González: e é que cando o barco afunde, todo o mundo escapa.

A outra opción sería a de Estrella; xa sen entrar en valoracións máisideolóxicas, ten antecedentes que a debería deshabilitar seriamente para exercer de representante política de ninguén: en outubro de 2005, cando fora o escándalo de Aquagest, Estrella Vázquez non tivo reparo en saltar a disciplina do partido para favorecer na adxudicación do servizo de aguas de Ordes ao seu marido, descarado caso de nepotismo que foi levado aos xulgados.

-O PSOE sigue a ser o caos organizativo que sempre foi neste concello, unha plataforma para egos individuais. Na historia máis recente temos o caso de Hermida, candidato á alcaldía polos “socialistas” que non lle tremeu o pulso en pasarse ao goberno de Martino, e ir despois de terceiro nas listas do PP. Aí temos as trifulcas de Esther Couto e Nel Astray -quen xa analizamos noutro post-, e a aventura madrileña da primeira. Agora, os concelleiros socialistas que goberna com Regos, recibe moitas críticas -sobre todo personalizadas en Pedreira-de outros militantes do PSOE, que os acusan de traidores. O último affaire protagonizouno Xesús Pampín ao negarse a votar os orzamentos e criticando duramente no pleno ao actual goberno, sendo expulsado da corporación. El substituira no cargo a Ana María Álvarez, tamén descontenta co papel do PSOE no goberno de Regos e que conta a quen queira oila que lle gustaría presentarse cun partido que realmente represente as súas ideas.

-NA non parece que vaia ter moito máis futuro. Despois do transfuguismo de Nel Astray, non semella que Juan Simón volte a presentarse, pero nunca se sabe.

-Por último, todo parece indicar que o BNG non terá reparos en colocar de cabeza de lista a Gonzalo Castro, un dos protagonistas do principal caso de corrupción do BNG durante o bipartito, o caso Carrumeiro.

-E aínda que nos faltan datos, corre desde hai meses o rumor de que Converxencia XXI (nacionalismo liberal) se presentará ás municipais en Ordes. O seu militante máis destacado é o ex-militante do BNG, e cantante do Chícharo Psicótico Fernando del Río Iglesias “Guillín”.

Triste balance podemos facer. Aínda que de momento nos faltan moitos datos, a presencia de tránsfugas e demostrados corruptos parece non ausentarse de ningunha lista, com excepción da última, da que tampouco temos moita información. Vótese a quen se vote, a ausencia de un mínimo democrático estará presente.