O PXOM de Frades: desastre total

Grazas a outro lector do blog poidemos saber das irregularidades que presenta o PXOM do concello de Frades, liderado por Miguel Prado. No pasado 15 de abril a Secretaría Xeral de Ordenación do Territorio e Urbanismo, dependente da Consellería de Medio Ambiente, Territorio e Infraestruturas, publicou un “Informe previo á aprobación inicial do Plan Xeral de Ordenación Municipal do Concello de Frades (A Coruña)”, que dá boa conta de todas as incongruencias que presenta o PXOM de Frades.
Vamos resumir só algunhas partes do documento (PTU-AC-09/007), xa que quen queira pódeo consultar aquí. Este é moi contundente, e contén ducias de irregularidades de todo tipo.

En primeiro lugar, o concello de Frades tiña 2.706 habitantes no 2009, pero con tendencia a disminuir. Aínda así, o plan prevé 620 novas vivendas para dentro de 20 anos, polo que “a superficie media de vivenda no solo urbano consolidado resulta desproporcionada”; indicando ademáis na Consellería que “O Plan non xustifica a necesidade de novas áreas residenciais e industriais, semellando a ocupación territorial das áreas consolidadas suficiente para absorber a demanda prevista.” Parece que no PP de Frades non se dan conta que o boom do ladrillo xa rebentou, e siguen a piñón fixo coa “política de asfalto, sufraxio universal...”, como cantan os de Dios ke te Crew.

O informe destaca a carencia dun sistema de depuración de augas residuais competente no rural de Frades, que o PXOM non emenda. Tampouco prevén novos sistemas xerais de equipamento, nen respectan o corredor ecolóxico do río Tambre. Gran parte de solo urbanizable delimitado industrial ocupa terreos que foron obxecto da concentración parcelaria calificados como altamente produtivos, polo que deberían ser clasificados como de protección agropecuaria. Así mesmo, tamén se invade “arborado de interese e masas arbóreas que deben ser protexidas por cumprir funcións ecolóxicas, produtivas, paisaxísticas e de protección forestal.”

A clasificación do solo do núcleo rural tamén presenta irregularidades: “A delimitación dos seguintes núcleos se traza a máis de 50 m das edificacións tradicionais: Sobre dos Campos, A Igrexa de Añá, O Vilar de Gafoi, Consello e Os Currillos - O Piñeiro. E nalgúns núcleos non segue as pegadas físicas existentes (camiños, ríos, regatos, cómaros) de acordo co art. 13 da LOUG: Chamuín, Fonsá, Mangoeiro e A Pereiruga – As Corredoiras.” e “A liñas que comprenden as área de expansión dos núcleos rurais de Lamela, Peñasco, Os Currás, o Castro de Galegos, Ribadas, A Pedreira de Abaixo, A Igrexa–A Casa, Vilarxoán e O Pumariño–O Monte, se sitúan a mais de 200 m da delimitación dos núcleos rurais tradicionais.” Outras non respectan a morfoloxía dos asentamentos tradicionais, e resultan desproporcionadas. Establécense ademais zonas de expasión que parecen forzadas, resultando “allea á estrutura tradicional dos asentamentos”. Tampouco xustifican que zonas valiosas sexan excluídas da categoría de solo rústico de protección forestal. Redúcense así mesmo sen xustificar zonas de protección das augas, e incluso o PXOM non identifica a existencia de cursos fluviais en zonas como Pazo – A Ponte. Tampouco ten en conta que a ribeira do Tambre ao seu paso polo concello de Frades te un risco de inundacións medio ou significativo (zona B). Non se delimitan tampouco as concas de interese paixasístico.

En definitiva, o PXOM de Frades foi feito dunha maneira totalmente trapalleira e neglixente, practicando unha especie de barra libre urbanística na que todo se convirte en edificable, sen respectar zonas de alta produtividade agropecuaria, zonas de interese ecolóxico e paisaxístia, zonas con risco de inundacións, etc. Recomendamos a lectura atenta do documento, sobre todo para as persoas afectadas máis directamente, de forma que podan protestar a tempo.

NOTA: Aproveitamos para agradecerlle a confianza e a información que depositou en nós un lector anónimo. Énchenos de alegría ver que pouco a pouco a xente confía en nós para denunciar as cacicadas destas terras do Ghaliñeiro.