Gonzalo Castro rexeita responder o noso cuestionario sobre a súa implicación na trama de Carrumeiro

Gonzalo Castro negouse finalmente a responder as preguntas que lle formulamos arredor da súa relación con Carrumeiro Media SL. Cada quen que saque as súas conclusións sobre isto. Publicamos integramente os correos electrónicos que nos enviou para que non haxa nada oculto. Pola nosa parte cremos que o caso está bastante claro no cuestionario que lle enviamos, e polo tanto, deixámolo zanxado, porque non vamos permitir que nos encerre neste bucle sen sentido discutindo todo o tempo o que xa é máis que evidente.
Só puntualizar duas cousas sobre o que nos comenta Gonzalo Castro: 1º, a razón do noso anonimato está explicada xa no primeiro post, non se escuse agora nel para non responder; por certo que calquera persoa que saiba algo de xornalismo entenderá que non hai unha entrevista máis segura e controlada para o entrevistado que aquela na que se lle permite responder por escrito. Ademais, recordámoslle a Gonzalo Castro que o seu partido, o BNG, cando recibimos as ameazas de Ordessiete nas que dicían que nos amparabamos no anonimato, etc., enviounos un comunicado solidarizándose con nós -o cal lle agredecemos moito, e que se queren podemos publicar aquí integramente-. 2º, Gonzalo Castro repróchanos que escribiramos isto: “Temos que dicir que é absolutamente falso que Gonzalo Castro Prado non teña nada que ver coa empresa Carrumeiro Media SL, e que o feito de que o diga é unha mentira gravísima e unha falta de respecto ao pobo de Ordes...” É mentira iso que dixemos?

Prezados/as amigos/as do blog marcosdaportela.blogspot.com:

Con respecto ao correo electrónico no que me remiten un cuestionario anónimo, para aclarar unha suposta polémica no seu blog, quero manifestarlles o seguinte:

1º) Agradezolles [sic] que recoñecesen a existencia de informacións inexactas no seu blog que me perxudicaban directamente, e que aceitasen publicar a solicitude de rectificación que lles remitin [sic] o 11 de xuño de 2010. Dentro da rectificación que publicaron, atopase [sic] un comunicado asinado por min, que resolve todas as dúbidas que poidan existir sobre o asunto, e ao que me remito a efectos aclaratorios.

2º) A suposta polémica que existe no seu blog debese [sic] á confusión xerada ao publicar a súa rectificación denominandoa [sic] "resposta de Gonzalo Castro", en lugar de facer referencia a que se trataba dunha rectificación da información inicialmente publicada por vostedes.

A este respecto, en favor da transparencia que din defender, SOLICITOLLES [sic] que publiquen integramente o correo electrónico que lles remitin [sic] o 11 de xuño de 2010, co título do asunto do mesmo, para dita publicación contan coa miña expresa autorización, xa que creo que poderá aclarar definitivamente a suposta controversia.

3º) Non teño ningún problema en aclarar con vostedes as cuestións que consideren de interese, teño concedido numerosas entrevistas sobre as cuestións máis variadas a medios de comunicación de todo tipo, mais o que nunca farei será responder a un cuestionario anónimo, por respecto aos máis de 1.500 veciños e veciñas de Ordes que deron o seu apopio ao BNG nas pasadas eleccións municipais, e porque entendo que a transparencia debe ser esixíbel a ambas partes.

Sorpréndeme a súa obsesión por permanecer no anonimato, e sen pretender polemizar, teño que dicirlles que na miña época de militancia nos Comités Abertos de Facultade (CAF), ou na Asociación para a Defensa Ecolóxica de Galiza (ADEGA), denunciábamos numerosas inxustizas e práticas rechazábeis sen utilizar o anónimato
[sic], o que provocou que tivesemos que soportar numerosas presións, mais eramos conscientes de que era a única forma de que as denuncias tivesen credibilidade e gozasen de lexitimidade diante da sociedade.

Ainda [sic] así, como non é norma do meu comportamento a de esconderme, comunicolles [sic] que se queren aclarar todas as cuestións que estimen de interese, contan coa miña absoluta colaboración, para o que só terán que poñerse en contacto conmigo e concertar unha cita para realizar unha entrevista. Por outra banda, para que teñan absoluta tranquilidade, teñen o meu compromiso inquebrantábel de que respectarei totalmente o seu anonimato e non comunicarei a ninguén a súa identidade.

* Reiterolles [sic] a petición da publicación íntegra do correo electrónico que lles remitin [sic] o 11 de xuño de 2010, así como a publicación, tamén íntegra, do presente correo electrónico.

Un cordial saúdo.

Gonzalo Castro Prado
Portavoz Municipal do BNG

Cumprindo os desexos de Gonzalo Castro publicamos tamén o primeiro correo electrónico que nos enviou:

Srs/as administradores/as do blog “marcosdaportela.blogspot.com”

Ordes,
11 de xuño de 2010

Estimados Srs/as:

Dirixome [sic] a vostedes en relación ao post publicado no seu blog o 10 de xuño de 2010, que facía referencia á suposta relación de Gonzalo-Henrique Castro Prado coa entidade mercantil Carrumeiro Media, S.L.

Dentro desa información dise literalmente o seguinte:

“Polémica en Ordes

Ao estar Gonzalo Castro implicado na trama, a política local tamén se viu sacudida. En xuño do ano pasado Gonzalo Castro declarará na Voz de Galicia o seguinte:

«Estas acusacións son rotundamente falsas, xa que eu non teño acción algunha nin
participación en ningunha empresa que contrate coa Administración pública».

En relación con estas informacións os/as administradores/as do blog realizan a seguinte acusación contra a miña persoa:

“Temos que dicir que é absolutamente falso que Gonzalo Castro Prado non teña nada que ver coa empresa Carrumeiro Media SL, e que o feito de que o diga é unha mentira gravísima e unha falta de respecto ao pobo de Ordes...”

A acusación de que Gonzalo Castro

Prado mentiu cando en xuño de 2009 declarou que non tiña acción algunha nin participación en ningunha empresa que contratase coa Administración pública resulta tendenciosa e carente de veracidade, e é producto [sic] da ausencia dun mínimo contraste da información, xa que Gonzalo Castro Prado desvinculouse da citada empresa o 13 de abril de 2007, deixando de ter accións na mesma nesa data, o que se pode acreditar mediante unha escritura pública outorgada nesa data ante o notario de Santiago de Compostela, Álvaro Moure Goyanes.

Poñome [sic] á súa enteira disposición para amosarlles persoalmente a citada escritura que, como é obvio, non lles podo remitir, xa que infrinxiria [sic] a Lei de Protección de Datos, ao figurar datos persoais de terceiras persoas.

Por tanto, a información citada non é veraz, a consecuencia dunha ausencia de contraste da información recollida en internet polos administradores do blog, polo que ao abeiro do disposto na Lei Orgánica 2/1984, de 26 de marzo, reguladora do dereito de rectificación, exercitase [sic] o dereito a rectificar a citada información solicitando a publicación da seguinte información, que deberá ser difundida polos mesmos medios e coa mesma repercusión que a noticia publicada o 10 de xuño de 2010 (facebook, chuza,…):


GONZALO CASTRO NON MENTIU RESPEITO Á SÚA PARTICIPACIÓN EN CARRUMEIRO

O portavoz do BNG de Ordes deixou a empresa antes de ser concelleiro

Respeito á información difundida por este blog o pasado 10 de xuño de 2010, titulada “Gonzalo Henrique Castro e o escándalo de Carrumeiro Media, S.L.”, temos que decir que cando Gonzalo Castro afirmou en xuño de 2009 a La Voz de Galicia que non tiña ningunha acción nin participación en ningunha empresa que contratase coa Administración pública, estaba a dicir a verdade, xa que Gonzalo Castro desprendeuse das accións que tiña en Carrumeiro Media o 13 de abril de 2007, en escritura pública suscrita ante o notario de Santiago, Álvaro Moure Goyanes. Por outra banda, con respecto a este asunto, reproducimos o seguinte comunicado de Gonzalo Castro, aclarando a cuestión:

1º) Todas e cada unha das miñas declaracións públicas e privadas, en relación coa empresa chamada Carrumeiro, son certas, por se tratar dun compromiso ético e persoal o de dicir sempre a verdade.

2º) As declaracións públicas feitas nun medio de comunicación en xuño de 2009, nas que afirmei: “Estas acusacións son rotundamente falsas, xa que eu non teño acción algunha nin participación en ningunha empresa que contrate coa Administración pública”, son absolutamente veraces, ratificándome absolutamente no dito e reiterando hoxe as mesmas afirmacións que fixen aquel día.

3º) A miña participación na empresa chamada Carrumeiro deixou de existir o 13 de abril de 2007, xa que nesa data procedín á venda das miñas accións, tal como consta en documentos públicos asinados ante o notario de Santiago, Álvaro Moure Goyanes. O feito de que por parte dos administradores da empresa non se rexistrase a escritura no rexistro da propiedade até moito despois é unha anomalía en absoluto imputábel á miña vontade, xa que desde a data reseñada eu non formaba parte da citada empresa.

4º) Sempre tiven e terei como prioritario e fundamental actuar con escrupuloso respecto aos principios éticos, por iso desvinculeime da citada empresa antes das eleccións municipais de 2007 e, por tanto, antes de que accedese ao cargo público de concelleiro e Portavoz Municipal do BNG en Ordes, malia que non tiña ningunha obriga legal de facelo, xa que a citada empresa non tiña contratos co Concello de Ordes e, por tanto, non existia ningunha incompatibilidade legal para que poidese seguir participando dela e ser ao mesmo tempo concelleiro en Ordes, mais, ainda así, decidín deixar a empresa antes das eleccións municipais porque considero que o exercicio dun cargo público debe vir acompañado dun escrupuloso e ríxido respecto ás normas máis esenciais da ética, así como polo meu compromiso e respecto aos veciños e veciñas de Ordes.

Gonzalo Castro Prado

Portavoz Municipal do BNG de Ordes

Agardando a pronta rectificación da información difundida reproducindo o comunicado que figura en negrita na presente carta, e conforme ao disposto no artigo 3 da Lei Orgánica 2/1984, aproveita a ocasión para enviar-lle un cordial saúdo.

Gonzalo Castro Prado

Portavoz Municipal do BNG de Ordes