175 persoas en contra de que a Olympus, a orquestra do narcotráfico, veña a Poulo

A campaña lanzada por contra a actuación da Orquesta Olympus na festa do 24 de Poulo (24 de setembro) -polos contidos machistas, homófobos e racistas do seu espectáculo- conseguíu máis de 175 apoios (de persoas e entidades) no Facebook. Entre as persoas que protestan pola actuación desta orquesta cóntanse o concelleiro do BNG Ramiro Recouso Liste, e a deputada cercedense no Parlamento Galego Silvia Fraga do PSOE. Apoian tamén a protesta grupos musicais de Ordes como Kastomä, Chícharo Psicótico, ou a Cona Ye-Ye; e outros de toda Galiza como Avante “Rock da Galiza, Ulträqäns ou Ruxe-Ruxe. Apoian tamén o BNG de Silleda e Melide, o Jogafan Ordes FS, Sporting Koes da Laracha, e outros.


Con isto o Subcomandante Marcos da Portela quere expresar o gran rexeitamento público que produce esta actuación musical cargada de contidos machistas, racistas e xenófobos, nas festas da parroquia de Poulo. Toda a polémica desatada nos últimos días parece que se esqueceu despois de que “Peke”, o cantante da Olympus, pedise publicamente disculpas. Non obstante, en polo menos dúas actuacións -en Rebordechán e Guitiriz- despois destas disculpas o dito cantante insistía no escenario da súa orquesta que “se eu fose homosexual non tería a este maricón do carallo na orquesta”. Por se fora pouco, acábase de saber que, ademais, o dono da Orquestra Olympus, José Ferreiro Magariños, está preso por dos maiores alixos de cocaína (6.000 quilos); varias voces indican que o éxito da Olympus (derroche de medios técnicos) foi feito a base de diñeiro da cocaína.

Momentos difíciles para a comisión de festas de Poulo

Polos comentarios que se podem ver neste blog, a comisión de festas de Poulo está a pasar un momento complicado por esta polémica. Que quede claro que o Subcomandante Marcos da Portela non ten nada contra a xente que, sen cobrar un peso, ano tras ano pon esforzos e ilusión en continuar coas festas parroquiais, e somos conscientes do traballo que iso dá. Non obstante, non debe ser excusa para eliminar esta actuación do seu programa das festas, pois do contrario, estase a apoiar a esta orquestra de impresentables. Desde aquí mandámoslle ánimos á xente da comisión para que dé ese paso valente e cheo de dignidade!

Moito máis grave é o silencio da corporación municipal e todos os grupos políticos que, sabedores da popularidade da orquestra, non se atreven a facer nen a máis mínima observación sobre a actuación racista de Ordes. Para colmo de males, hoxe a Olympus anunciou no seu blog que actuarán en Frades no día 29 deste mes, e acaban de confirmar a actuación. Como pode ser que despois de facerse públicos todos estes datos, aínda haxa unha comisión que fose buscar a Olympus?