Nova enquisa: "Como se podería solucionar o caciquismo en Ordes?"

Nesta nosa breve marcha polas Terras de Ordes recibimos xa moitas mensaxes de apoio, pedíndonos que denunciásemos inxustizas e de colaboración. Pero tamén algunha que criticaba que só puxésemos o acento na denuncia, e non na crítica construtiva. É evidente que o importante é construir, pero nos pensamos que é imprescindible que existan mecanismos independentes como este, de control, que se especialicen na denuncia.


De todos xeitos, desta vez propoñemos unha enquisa nova, de outro cariz. Seguiremos con as enquisas de escarnio, arelando chegar algunha vez ao nivel desta que realizaron os compañeiros do Cortelho da Laracha , obra mestra da acción caciquil e tiomarquista; pero agora tocalle o turno a unha un pouco máis seria. Á pregunta "Como se poderia solucionar o caciquismo em Ordes?" damos 5 posibles solucións que poden abarcar todas as opcións:

As dúas primeiras son en clave partidaria, que a oposición gañe as eleccións e tome o poder:

1. Que o PP, que agora está na oposición, volva ao poder.

2. Que sexa o outro partido da oposición, o BNG, o que tome o poder.

Outras dúas son opcións que critican a estrutura mesma do sistema de goberno municipal:

3. Estabelecendo listas abertas e concelleiros revogábles. Deste xeito evitaríanse automaticamente casos de transfuguismo e fraudes con respecto aos votantes, e tamén evitaría ter que elixir o "pack" completo dunha lista cando se pense que non todas as persoas que van nelas teñen a mesm valía.

4. Instaurando un sistema de democracia directa (asembleas de parroquia, etc...). Trataríase de que a viciñanza decidise directamente sobre as cuestións que lle afectan sen intermediarios políticos, recuperando institucións vellas como as asembleias de parroquia, e dándolle validez legal como propoñía Castelao.

E para as persoas que pensen que ao actual goberno só lle falta rodarse, está a quinta opción:

5. Que siga o goberno actual e poda continuar o seu proxecto

Pódense seleccionar varias opcións á vez. E quen queira comentar a maiores que aproveite, faltaría máis!